Áskorun!

Fyrir nokkrum mánuðum tók ég þá ákvörðun um að poppa sjálfan mig aðeins upp. Bæta ráð mitt ef svo má segja. Ákvað t.d. að hætta allri neyslu nikotíns, sama í hvaða formi það er, fara að hreifa mig reglulega og reyna að bæta mataræðið. Þá var hugmyndin sú takmarka neyslu áfengis við ákveðin félagsleg tækifæri en það skal ekki vera forsend þess að maður geti haft samskipti við fólk. Hætta svo að tala illa um náungan og leitast við að vera bjartsýnn og jákvæður í hvívetna.

Þetta átak fór af stað fyrir tæpum þrem mánuðum og hefur gengið þokkalega. Að vísu hefur á köflum verið erfitt að halda utan um þetta allt og maður á það til að gleyma sér. Þá hafa búferlaflutningar og ákveðið rótleysi síðan ég flutti aftur heim sett strik í reikninginn. Kannski hefur manni skort ákveðið aðhald, enda hef ég ekki verið að básúna þessum nýja lífsstíl sérstaklega.

En núna er tímabært að láta verkinn tala!

Það sem ef til vill er hvað mest áríðandi er að koma sér í form. Við Viktor ræddum það í hálfkæringi fyrir skemmstu hvort ekki væri sniðugt að reyna að skokka hálft maraþon síðsumars og þannig hefði maður eitthvað að stefna að. Ég hef núna tekið ákvörðun um að svo skal verða.

Markmiðið er eftirfarandi:

Þann 18.08.2007 ætla ég Sigurður Valur Sigurðsson að taka þátt í Reykjavíkur maraþoni og hlaupa þar hálft maraþon (21 km). Ég stefni að því að klára hlaupið á innan við 1 klukkustund og 45 mínútum, allt undir tveim klukkustundum verður þó talin ásættanlegur árangur en allt umfram verður túlkað sem mikill ósigur. Til að ná þessum markmiðum ætla ég að fara út að skokka 3-5 sinnum í viku hverri fram að hlaupinu og verða engar undantekningar á þeirri reglu nema hugsanlegar líkamlegar hömlur svo sem fótbrot eða dauði!

Að hlaupinu loknu mun svo verða haldið mikið partí að frumkvæði undirritaðs þar sem nautnir holdsins verða í fyrirrúmi og allt það sem ég stefni að því að breyta og bæta verður gert afturvirkt. Það verður étið þangað til kolesterolið vellur út um eyru gestana, vökvatapið verður bætt upp með ótæpilegri neyslu áfengis og allt og allir sem ekki mæta í partíið (eða verður ekki boðið) verða dissaðir.

Nú spyr ég brekkumenn og aðra lesendur hvort einhver sé tilbúinn að taka þennan slag með mér? þorir einhver? Þetta er áskorun!!

Siggi

 

Athugasemdir

[Siggi (IP-tala skráð) 13.3.2007 kl. 15:04]

Nei, í alvöru........ komon!!!

[Arnfinnur Teitur ofurhlaupari (IP-tala skráð) 13.3.2007 kl. 16:38]

Annað hvort ætlar þú að hlaupa þetta á innan við 1:45 og allt annað er ósigur eða ekki.  Það getur ekki verið ásættanlegt að hlaupa yfir markmiðum sínum. Maður getur ekki endalaust lengt í snörunni...."allt undir 2 tímum er ásættanlegt - allt undir 2 og hálfum er ekki vonbrigði - ef ég kemst í mark er það sigur í sjálfu sér...."  bollox

Annað hvort eða Siggi !

[Jón Þór (IP-tala skráð) 13.3.2007 kl. 16:55]

Uuhmm...ekki ég! En ég er klár í party...

[Tryllti (IP-tala skráð) 13.3.2007 kl. 20:16]

Ég er klár slæ þó þann varnagla að ég verði ekki að eltast við Tarfinn á svæði 2 þegar hlaupið fer fram.  Þessir atburðir gætu skarast og þá verður Tarfurinn tekinn fram yfir.

[Siggi (IP-tala skráð) 14.3.2007 kl. 09:38]

Ég mundi segja að þetta væru mjög skýr markmið Arnfinnur: Annarsvegar raunsætt markmið (2 klukkustundir), en þar sem ég ætla að leggja metnað í þetta verk stefni ég að sjálfsögðu á að gera enn betur (1 klukkustund og 45 mín) (Best-case scenario). Þetta eru mjög algeng vinnubrögð í allri áætlunargerð og eitthvað sem þú hefðir átt að læra á Bifröst á sínum tíma. Hefði getað komið að gagni þegar þú varst að undirbúa þig fyrir Reykjarvíkur maraþonið í fyrra!.... Og Viktor, þú verður náttúrlega “eltandi Tarf”, hvort sem það verður upp á heiði eða á götum Reykjavíkur, (Hreindýrið eða mig). Eini sénsinn fyrir þig til að náir öðrum hvorum okkar er að þú skjótir okkur úr launsátri.