Dauð og ómerk

FYRIRSÖGNIN er þrjú orð sem fótgönguliðar flestra flokka hrópa nú hástöfum hvar sem tveir eða fleiri kjósendur koma saman. Hræsnin sem í þessari upphrópun felst er ástæða þessara skrifa minna.

Í lýðræðisríki er öllum heimilt að bjóða fram krafta sína til starfa á Alþingi og/eða sveitastjórnum, hafi menn á annað borð kosningarétt og óflekkað mannorð. Einnig er öllum heimilt að kjósa í Alþingis og sveitastjórnarkosningum hafi viðkomandi til þess aldur og uppfylli skilyrði um búsetu og ríkisborgararétt. Allir hafa því sama vægi innan sama kjördæmis og er því atkvæðið mitt hér í NV kjördæmi alveg jafn gott og atkvæði Guðbjartar, Jóns, Magnúsar eða Sturlu.

Vissulega má segja að atkvæði greitt Samfylkingunni sé dautt og ómerkt í augum sjálfstæðismanna og svo öfugt. Atkvæðið lifir samt sem áður næstu 4 árin og hefur nákvæmlega sama vægi og önnur. Það má þó halda því fram að komi sá flokkur sem ég greiddi atkvæðið mitt ekki að þingmanni þá sé atkvæðið mitt einskis virði. Með nákvæmlega sömu rökum má segja að öll þau atkvæði sem greidd eru ákv. flokki umfram það sem þarf til að ná einum þingmanni séu einskis virði, ef við gefum okkur að flokkurinn komi einungis einum þingmanni að.

Það að greiða atkvæði er því á ákveðinn hátt eins og að taka þátt í happdrætti. E.t.v. greiðir maður atkvæði alveg eins og "allir" hinir og lendir því í "sigurliðinu". Getur skemmt sér og trallað með "sínu liði" á kosninganóttina. Svo er allt eins líklegt að maður tapi og það lið sem maður greiddi atkvæði sitt kemst ekki í deild þeirra bestu. Það skiptir þó ekki máli ef maður greiðir atkvæðið eftir sinni bestu vitund, kynnir sér fyrir hvað flokkarnir og fólkið í þeim standa og hvernig þeir sjá landið okkar fyrir sér.

Umfram allt ber hverjum kjósanda að gera skyldu sína og kjósa þann 12. maí nk. Hvet ég alla til að skoða hug sinn og hjarta áður en X-ið er sett við einhvern bókstafinn og láta ekki skoðanakannanir eða upphrópanir fótgönguliðanna hafa áhrif á sig.

Höfundur er tölvunarfræðingur og kjósandi í NV-kjördæmi.

Greinin birtist áður í Morgunblaðinu þann 6.5.2007

Athugasemdir

[Arnfinnur (IP-tala skráð) 7.5.2007 kl. 22:41]

Ertu að gefa í skyn að Íslandshreyfingin sé fasistaflokkur og ógn við lýðræðið?

Skammastu þín.

[Tryllti (IP-tala skráð) 8.5.2007 kl. 22:23]

Það er misjafnt hvað menn lesa út úr þessu Arnfinnur.  Hvernig þú fær þetta út er mér hulin ráðgáta.  Þessi pistill virðist vera eins og mörg ljóð.  Fólk virðist lesa ótrúlegustu hluti út úr honum.

Alltaf gaman að fá nýjar nálganir á hann.

[Óskar Örn (IP-tala skráð) 9.5.2007 kl. 08:30]

Menn hljóta að fara í stjórnmál til að hafa einhver áhrif.  Stærstu áhrifin af tilkomu Íslandshreyfingarinnar eru þau að stjórnarandstöðuflokkarnir fá færri atkvæði.  Held að þegar uppi er staðið þá séu "aðal" málefni flokksins ekki að ráða úrslitum.  Einhver benti á að það væri furðulegt að koma fram með framboð á síðustu metrunum, af hverju er ekki búið að undirbúa jarðveginn betur?  Ef það er svona mikil fyrirlyggjandi óánægja, af hverju er þá ekki búið að negla þetta fyrir löngu síðan?